بەپێی ڕاپۆرتی پەیوەندییە گشتییەکانی زانکۆی کوردستان؛ دکتۆر محەممەد ڕەزاقی ڕۆژی دووشەممە ٢٠ی ڕێبەندان لە کۆبوونەوەی ئەنجومەنی زانکۆدا کە بە ئامادەبوونی جێگری فێرکاریی وەزارەتی زانست، توێژینەوە و تەکنەلۆژیا بەڕێوەچوو، ئاماژەی بە گرنگیی سیستەمێکی ئاماری ورد کرد و وتی: نەبوونی یەکگرتوویی لە داتا فێرکارییەکاندا یەکێکە لە ئاستەنگەکان، هەر بۆیە دامەزراندنی «ناوەندی ئاماری فێرکاری» بۆ چارەسەرکردنی ناتەبایییەکان و بڕیاردان لەسەر بنەمای داتای ورد خراوەتە کارنامەی زانکۆوە. ناوبراو ڕایگەیاند کە زانکۆ ئێستا خاوەنی ٢٠٤ خولی فێرکارییە لە ئاستە جیاوازەکاندا و پەرەپێدانی کوالیتیی ئەم بەشانە بەردەوامە.

دکتۆر ڕەزاقی هەروەها ئاماژەی بە پێویستیی نۆژەنکردنەوەی تاقیگەکان و پەرەپێدانی ژێرخانە فێرکارییەکان کرد و وتی کە کارە کارگێڕییەکان بۆ دابینکردنی بودجەی پێویست ئەنجام دراون. لە بەشێکی دیکەی قسەکانیدا، باسی لە سەرکەوتنی زانکۆ لە بەڕێوەبردنی تاقیکردنەوە مەجازییەکان و داڕشتنی وانە نوێیەکانی وەک «بەرگریی شارستانی» و «ئامادەیی لە بەرامبەر ڕووداوەکان» کرد. لە کۆتاییدا، جێگری فێرکاریی زانکۆ باسی لە قۆناغەکانی کۆتایی پەسندکردنی ماستەری «زمان و ئەدەبی کوردی» و دامەزراندنی بەشی «پیشەسازیی بەرد» کرد وەک هەنگاوێک بۆ پەرەپێدانی لێهاتوویی پیشەیی لە پارێزگادا.