بەپێی ڕاپۆرتی پەیوەندییە گشتییەکانی زانکۆی کوردستان؛ ئەبولفەزڵ واحیدی ڕۆژی دووشەممە لە کۆبوونەوەی ئەنجومەنی زانکۆی کوردستاندا، وێڕای دەستخۆشی لە میواندۆستی و کەرامەتی خەڵکی پارێزگای کوردستان، جەختی لەسەر گرنگیی پەرەپێدانی کوالێتی و بەرهەمداری لە خوێندنی باڵادا کردەوە و وتی: "هیوادارین زانکۆی کوردستان بە سەرنجدان بە سەرمایە مرۆییە گەورەکەی، بتوانێت وەک ئەوەی کە شایستەیە بگاتە پێگەیەکی بەرز لە ئاستی نیشتمانی و ناوچەییدا."

ناوبراو بە ئاماژەدان بە بەڕێوەچوونی تاقیکردنەوەکانی نیوەساڵی ڕابردوو وتی: "وەک ئاگادارن تاقیکردنەوەکانی مانگی خەرمانان بە دواکەوتنەوە بەڕێوەچوون و دەستپێکی نیوەساڵی نوێش لەگەڵ هەندێک ئاستەنگدا بوو، کە سەرەڕای دابینکردنی ژێرخانەکان، کوالێتیی بەڕێوەچوونی تاقیکردنەوەکان و دادپەروەریی فێرکاری بەهۆی سنوورداریی دەستڕاگەیشتنی خوێندکاران بە ئینتەرنێت و ئامرازە نوێیە فێرکارییە ژیرەکان، بە شێوەیەکی تەواو جێبەجێ نەکرا." جێگری فێرکاریی وەزارەتی زانست هیوای خواست کە بە پلاندانانی باشتر، نیوەساڵی داهاتوو ئەزموونێکی سەرکەوتووتر بۆ خوێندکاران و مامۆستایان بێت.

واحیدی وێڕای بەرزڕاگرتنی ساڵیادی سەرکەوتنی شۆڕشی ئیسلامی و یادی شەهیدانی شۆڕش، ڕۆڵی دڵسۆزی، بڕوا و متمانەی خەڵکی بە ئیمام خومەینی (ڕە) لە پێکهاتنی شۆڕشدا بە بەرچاو وەسف کرد و وتی: "سیستەمی فێرکاریی ئێرانیش لە سەرەتای شۆڕشەوە تا ئێستا گۆڕانکاریی زۆر گەورەی بەسەردا هاتووە."

ناوبراو ئاوڕێکی لە مێژووی زانکۆی کوردستان دایەوە و وتی: "چالاکییەکانی ئەم زانکۆیە لە ساڵی ١٣٥٣ دەستی پێکردووە و لە ساڵی ١٣٥٥ وەک خانەی مامۆستایان و بەشێک لە زانکۆی کرماشان دەستی بەکار کردووە و لە ساڵی ١٣٧٠ وەک زانکۆیەکی سەربەخۆ ناسێندرا؛ ئەو نەمامەی ئەو کاتە چێنرا، ئێستا بووەتە دارێکی بەنرخ کە بەرهەمەکانی بۆ شاری سنە، پارێزگای کوردستان و ناوچەی ڕۆژئاوای وڵاتە و پێگەکەشی لە داهاتوودا بەرزتر دەبێتەوە."

لە بەردەوامییدا باسی لە ڕەوتی پەرەپێدانی خوێندنی باڵای وڵات کرد و وتی: "لە سەرەتای شۆڕشەوە تا ئێستا گەشەی زانکۆ و بەشە زانستییەکان بە خێراییەکی زۆر ڕوویداوە، بەڵام پەرەپێدانی چەندایەتی بەبێ ڕەچاوکردنی کوالێتی و بەرهەمداری، بەس نییە."

واحیدی ڕایگەیاند: "لە ئێستادا زیاتر لە ١٨٠٠ دامەزراوەی خوێندنی باڵا لەوانە زانکۆ و پەیمانگا حکومی و ناحکومییەکان لە وڵاتدا هەن. لە سەردەمی گەشەی زانکۆکاندا ژمارەی خوێندکاران نزیکەی ٤ ملیۆن و ٤٠٠ هەزار کەس بوو، کە ئێستا ئەم ڕەوتە ڕووی لە کەمی کردووە و بۆ ٣ ملیۆن و ٣٠٠ هەزار کەس دابەزیوە. ئەمەش دەری دەخات کە تەنیا زیادکردنی ژمارەی زانکۆ و بەشەکان، بەبێ وەڵامدانەوەی پێداویستیی ڕاستەقینەی کۆمەڵگا و خوێندکاران بەس نییە و پێویستی بە بەڕێوەبردنی ژیرانە و پلاندانانی ورد هەیە."

هەروەها وتی: "کەمبوونەوەی ژمارەی خوێندکاران لە زانکۆکاندا چەندین هۆکاری هەیە، لەوانە بابەتە دیمۆگرافییەکان و گۆڕانی پارادایم و نموونەکان لە سەردەمی ئێستادا؛ چونکە ئەمڕۆ دیدگاکان بەرامبەر بە خوێندن و تەنیا وەرگرتنی بڕوانامەی زانکۆ گۆڕاوە و زیاتر بەرەو فێربوونی لێهاتوویی و پیشە هەنگاو دەنێت."

واحیدی بە ئاماژەدان بە دۆخی زانکۆی کوردستان وتی: "بۆ چارەسەرکردنی کێشەی شوێن و پۆلەکان، گۆڕانکاری لە کاتی وانەکاندا کراوە و ئێستا بە پلاندانانی گونجاو، دەرفەتی سوودوەرگرتنی باشتر لە شوێنە فێرکارییەکان ڕەخساوە." جەختیشی کردەوە کە دامەزراندنی ناوەندەکانی گەشەپێدان و باڵایی فێرکاری و گواستنەوە لە فێرکاریی نەریتییەوە بۆ فێرکاریی نوێ، بەکارهێنانی نەرمەواڵە و تەکنەلۆژیا فێرکارییەکان و گۆڕینی ڕوانینی خوێندکاران بۆ فێربوون، لە ئەولەوییەتە گرنگەکانی زانکۆکانن بۆ بەرزکردنەوەی کوالێتیی فێرکاری.

هەروەها ئاماژەی بە سنوورداریی بودجەی خوێندنی باڵا کرد و وتی: "پشکی زانکۆکان لە بودجەی گشتیی وڵات کەمتر لە یەک لەسەدە و ئەمەش سنوورداریی لە دابینکردنی سەرچاوەکان بۆ پەرەپێدانی ژێرخانەکان دروست کردووە، بۆیە پێویستە زانکۆکان بە بەڕێوەبردنی گونجاو، ڕاکێشانی سەرچاوەی نوێ و زیادکردنی بەرهەمداری، درێژە بە ڕێڕەوی پێشکەوتن بدەن."