دکتۆر عادل سی و سێ مەردە، سەرۆکی زانکۆی کوردستان، لەم ڕێوڕەسمەدا بە جەختکردنەوە لەسەر گرنگیی پەرەپێدانی هاوکاریی ئامانجدار لەگەڵ پیشەسازیدا، ڕایگەیاند: «هیوادارین بە جێبەجێکردنی ئەم لێکتێگەیشتنامەیە، زەمینەی کارلێکی بەردەوام لەنێوان زانکۆ و پیشەسازیدا زیاتر لە جاران بڕەخسێت و شایەتی کاریگەرییە ئەرێنییەکانی لە بوارەکانی فێرکاری، توێژینەوەیی و ژینگەییدا بین.» ناوبراو زیادی کرد: «ئەم لێکتێگەیشتنامەیە دەرفەتێکی گونجاوە بۆ بەرزکردنەوەی کارامەیی قوتابیان، کەڵکوەرگرتن لە ژێرخانە پیشەسازییەکان و پەرەپێدانی پڕۆژە توێژینەوەییە کارپێکراوەکان.»

مەحموود نەسیری، بەڕێوەبەری جێبەجێکاری کۆمپانیای بەرهەمهێنانی نەوت و گازی ڕۆژئاوا، بە ئاماژەدان بە فراوانیی چالاکییەکانی ئەم کۆمپانیایە لە پارێزگاکانی کرماشان، ئیلام و لوڕستاندا، جەختی لەسەر گرنگیی ڕۆڵی کێڵگە هاوبەشەکان و پێویستیی بەرهەمهێنانی بەردەوام کردەوە. ناوبراو گوتی: «کۆمپانیای نەوت و گازی ڕۆژئاوا بە زیاتر لە ٢٧٠٠ کارمەند و ٢٢٠٠ کیلۆمەتر هێڵی گواستنەوە، یەکێکە لە کۆمەڵگە گرنگەکانی وەزارەتی نەوت و هەر بۆیە هاوکاری لەگەڵ بەشە جیاجیاکانی زانکۆدا بۆ ئێمە لە ئەولەوییەتدایە.» ناوبراو بە باسکردنی پێویستیی کەمکردنەوەی بۆشایی نێوان پیشەسازی و زانکۆ، ڕایگەیاند: «ئامادەین بە شێوەیەکی بەرفراوان کەڵک لە توانستە زانستی و توێژینەوەییەکانی زانکۆی کوردستان وەربگرین و لێکتێگەیشتنامەیەکی گشتگیر بۆ هاوکاریی درێژخایەن ببەستین.»

ئەحمەد ساعی، بەڕێوەبەری تەکنیکیی کۆمپانیاکە، بە ئاماژەدان بە توانستە زۆرەکان بۆ هاوکاریی هاوبەش، گوتی: «زەمینەی جێبەجێکردنی پڕۆژەی هاوبەش لە بوارەکانی هەڵسەنگاندنی پێکهاتەکان، شیکردنەوەی داتای وێنەیی، ئەندازیاریی بیرە نەوتییەکان، وزە، کارەبا، میکانیک و زیرەکیی دەستکرددا بوونی هەیە و بڕیارە کۆبوونەوەی پسپۆڕانە بە ئامادەبوونی مامۆستایان و توێژەرانی زانکۆ بەڕێوە بچێت.» ناوبراو هەروەها پێویستیی پیشەسازیی نەوتی بە هۆشمەندکردنی بیرەکان، پاراستنی داتا و پەرەپێدانی نەرمەکاڵا پسپۆڕییەکان بیر هێنایەوە و زانکۆی کوردستانی بە خاوەن توانای پێویست بۆ چوونە ناو ئەم بوارانەوە زانی.

لە بەشێکی دیکەی کۆبوونەوەکەدا، حەمید مورادی، بەڕێوەبەری بەشی توێژینەوەی کۆمپانیای نەوت و گازی ڕۆژئاوا، بە جەختکردنەوە لەسەر گرنگیی هاوکارییە زانستی و فێرکارییەکان، ڕایگەیاند: «زانکۆی کوردستان بە بوونی مامۆستای بەتوانا و کۆمپانیا زانست-بنەما چالاکەکان، دەتوانێت لە جێبەجێکردنی پڕۆژە توێژینەوەییەکان، پڕۆژە پیشەسازییەکان، بەڕێوەبردنی خولی فێرکاری، ڕاهێنان و سەرپەرشتیکردنی نامەی دەرچووندا ڕۆڵێکی کاریگەر بگێڕێت.»

ئەم لێکتێگەیشتنامەیە سەرەتای قۆناغێکی نوێیە لە هاوکارییە هاوبەشەکانی نێوان زانکۆی کوردستان و کۆمپانیای بەرهەمهێنانی نەوت و گازی ڕۆژئاوا لە پێناو گرێدانی هەرچی زیاتری نێوان زانست و پیشەسازیدا.